اللي يقولك ان بكرة هيبقي أحلي من النهارده هيبقي كداب كبير ومن نوعية الناس اللي لازم تنفضلهم ...مفيش مشكلة لو سمعتله شويه يعني لو كان قريب منك زي أبوك او اخوك الكبير أو المدير بتاعك ودا طبعا أولي من أبوك أو اخوك لان المدير طبعا علاقتك بيه تدخل في اطار علاقات من الدرجة الي قبل الأولي...المهم حاولت كتير فعلا مقولش كده واقول ان بكرة هيبقي أحلي من النهارده لاقيت ان مصر كلها كبيرها وصغيرها اول مبيتولد بيقولك ليت الشباب يعود يوما...وفين أيام زمان ايام مكانت الدنيا براح ومحدش شايل هم ولا أرفان زي مالناس أرفانة كده ...معلش تعالوا نكتئب شويه ونعمل مقارنات بسيطة علشان نقدر نفرق بين زمان ودلوقتي بس من غير ترتيب :
أولا : علي المستوي الإجتماعي...الزواج والذي منه
بما أنني من الشباب الذين رفعوا القبعات لفكرة الزواج المبكر فأحب أقولكم ان كونك تفكر انك تتجوز دلوقتي في الزمن دا هيدل انك شخص يأما مش طبيعي أو دمك خفيف حبتين ...لان ببساطة محدش طايق نفسه
زمان كان يقولك ابو البنت لما يلاقي الراجل الكويس اللي هيتجوز بنته يضلل عليه ويساعده علشان يستر علي بنته ويخلص من همها وكان عم الحاج يفضل ماسك في ديل الراجل لحد ميتقطع علشان يحلق يجوز البنية قبل ميجي سنها العشرين علشان هتعنس لو بقي عندها واحد وعشرين سنة ومتجوزتش
دلوقتي الراجل من دول لو روحت اتقدمت لبنته يطلع عين أهلك علشان انت طبعا جي تاخد القرشين اللي تعب فيهم ويفضل يسئلك فين الشقة وكام اوضه هتفرشها ازاي هتجيب شبكة اد ايه...معلش يابني لازم اطلع عين أهلك علشان دي بنتي مش هرميها...ماشي ياعم الحاج اقوله بهدل زي منت عاوز محنا جيل الشباب اللي مكتوب عليه البهدلة من الالف الي الياء واقوله في الاخر ياعم بحب بنتك يقولي خلاص نقرأ الفاتحة ويقراها وهو بيبص لمراته وكانه بيقولها الواد دا ايه نظامه ربنا يسترها...
زمان بردو كنت تلاقي البنت ام ضفيره الحلوة دي اللي كان اخرها تحط خياره علي وشها علشان يقولوه عليها شبه ليلي جمال أو سعاد حسني ...وكانت مطالبها بسيطة ...من الاخر عاوزة كل يوم خميس تاكل درة مشوي علي الكورنيش في شبرا ويوم لما تتعظم تقولك وديني السيما والنبي يأخويا علشان اشوف الدونيا قبل مااموت...
دلوقتي احساس البنات بنفسهم زاد علي الاخر وكل واحده فاكرها نفسها مفيش زيها في مصر وتحس من كلامها علي نفسها ووصفها لنفسها انك اول مهتفتح التلفزيون مثلا هيبجبوا عنها خبر في نشرة الساعة تسعة أو مثلا هتتكعبل في صورتها علي غلاف مجلة
البنت دلوقتي عاوزة كل حاجة واحيانا بتدي لما بتحب تدي...بس الغالبية دلوقتي عاوزين يعيشوا علي مستوي معين
علشان كده خمس تربع البنات في مصر مش متجوزة بس المشكلة الكبري ان تلت تربع الخمس تربع حوامل
ثانيا : علي مستوي الأغاني :
زمان أوي كان فيه الست الحاجة أم كلثوم والمعلم عبدالحليم حافظ وعبد الوهاب
وزمان كان فيه نجاة ووردة وفيروز
وزمان مش أوي كان فيه أحلي اغاني لعمرو دياب ومحيي وهشام عباس وحميد وعلي حميده كمان
دلوقتي فيه سعد الصغير وريكو وبوسي سمير
ثالثا : علي مستوي الماديات :
زمان الجنيه كنت تقدر تسوي بيه الهوايل ولو معاك مية جنيه تقف في أجدعها بلكونه وتقول بصوت عالي حد ليه شوق في حاجة ؟
انما دلوقتي يعيني علينا لو معاك جنيه تبرع بيه ولو معاك عشرة اركب بيهم تاكسي ولو معاك مية جنيه اتعشالك حاجة سريعة يدوبك تجيب حق الاكلة لو حلوة ...
زمان كان معاك عشرين الف جنيه تجيب بيهم شقة حلوة ...دلوقتي معاك ثلاثمائة وخمسون الف حاول تجيب حاجة كويسة لو لاقيت
زمان كان كيلو اللحمة بعشرة واحيانا بعشرين دلوقتي الكيلو بأربعين وأحيانا بخمسين
زمان كانت الشقة من حق الزوجة ودلوقتي الشقة مش موجودة أصلا
في النهايه اتمني اني اكون خلتكم تكتئبوا شوية وتحسوا انكم زهقانين ومتعقدين من العيشة واللي عايشنها
اشوفكم علي خير
